देवगडच्या शैक्षणिक क्षितिजावर नव्या नेतृत्वाचा उदय
‘इन्स्टिट्यूट ऑफ मॉडर्न एज्युकेशन’ देवगडच्या अध्यक्षपदी सदानंद पवार!
देवगड: प्रतिनिधी
ज्ञानाची गंगा घराघरांपर्यंत पोहोचवणाऱ्या आणि देवगडच्या शैक्षणिक प्रगतीचा कणा असलेल्या ‘इन्स्टिट्यूट ऑफ मॉडर्न एज्युकेशन’ या संस्थेच्या वार्षिक सर्वसाधारण सभेमध्ये एक महत्वाचा निर्णय घेतला गेला. आपल्या दातृत्वाने आणि शिक्षणप्रेमाने देवगड परिसराला समृद्ध करणारे व्यक्तिमत्व असलेले सदानंद पवार यांची संस्थेच्या अध्यक्षपदी एकमुखाने व अत्यंत उत्साहात निवड करण्यात आली.
संस्थेच्या वतीने चालवल्या जाणाऱ्या ‘उमा मिलिंद पवार हायस्कूल देवगड’ (इंग्लिश मिडीयम स्कूल) या ज्ञानमंदिराला आता श्री. पवार यांच्यासारख्या अनुभवी आणि दूरदृष्टी असलेल्या नेतृत्वाचा पारसस्पर्श लाभला आहे.
सदानंद पवार यांची अध्यक्षपदी निवड झाल्याने संपूर्ण देवगड तालुक्यातील शैक्षणिक क्षेत्रातून आणि पालकांमधून समाधानाचा सूर उमटत आहे.
श्री. पवार यांनी आजवर अनेक शाळांना भरघोस आणि भरीव आर्थिक मदत करून विद्यार्थ्यांचे भविष्य उज्ज्वल केले आहे.
देवगडमधील ग्रामीण भागातील विद्यार्थ्यांना जागतिक दर्जाचे शिक्षण आणि आधुनिक सोयी-सुविधा मिळाव्यात, यासाठी ते अहोरात्र धडपडत असतात.
‘देवगड एज्युकेशन बोर्ड, मुंबई’ या नामांकित संस्थेवर पदाधिकारी म्हणून काम करण्याचा त्यांना प्रदीर्घ अनुभव आहे. त्यांच्या याच अनुभवाचा फायदा आता देवगड इंग्लिश मिडीयम स्कूलला सुवर्णकाळाकडे नेण्यासाठी होईल, असा विश्वास व्यक्त होत आहे.
”सदानंद पवार यांच्यासारखे शिक्षण क्षेत्रातील उत्तुंग व्यक्तिमत्व संस्थेच्या सुकाणूवर बसल्याने शाळेच्या शैक्षणिक आणि प्रशासकीय कामकाजाला आता गरुडझेप घेण्याची नवी ऊर्जा मिळेल.”असा विश्वास व्यक्त होत आहे.
संस्थेच्या नियमित वार्षिक सभेत या निवडीवर शिक्कामोर्तब झाल्यानंतर संस्थेच्या आगामी काळातील प्रगतीचा आराखडा आणि धोरणात्मक कामकाजावर सविस्तर मंथन झाले. संस्थेच्या उर्वरित कार्यकारी मंडळाची निवड पुढील बैठकीत केली जाणार असल्याचे यावेळी जाहीर करण्यात आले.
या सभेला रशीद खान, द्विजकांत कोयंडे, योगेश पाटकर, मनीष भद्रा, हनीफ मेमन, आनंद कुलकर्णी, मावळते अध्यक्ष चारुदत्त सोमण आणि प्रणव नलावडे उपस्थित होते.
सभेच्या सांगतेवेळी उपस्थित सर्व सदस्यांनी पुष्पगुच्छ देऊन नूतन अध्यक्ष सदानंद पवार यांचे अभिनंदन केले आणि त्यांच्या भावी शैक्षणिक वाटचालीस आणि नव्या संकल्पांना मनापासून शुभेच्छा दिल्या.