कुणकेश्वर मंदिरात ११ मे रोजी रंगणार ‘आंबा महोत्सव’
देवगड /प्रतिनिधी
श्री क्षेत्र कुणकेश्वर येथे सोमवार, दि. ११ मे २०२६ रोजी प्रतिवर्षाप्रमाणे ‘आंबा महोत्सव’ उत्साहात साजरा करण्यात येणार आहे. या महोत्सवाच्या निमित्ताने मंदिर गाभारा आणि परिसरात हापूस आंब्यांची आकर्षक आणि देखणी सजावट केली जाणार असून, भाविकांसाठी हे विशेष आकर्षण ठरणार आहे.
विविध उपक्रम आणि प्रदर्शन:
या महोत्सवात केवळ सजावटच नव्हे, तर विविध जातींच्या आंब्यांचे प्रदर्शन आणि विक्रीही आयोजित करण्यात आली आहे. यासोबतच आंब्यांपासून बनविलेल्या विविध खाद्यपदार्थांची चव घेण्याची संधी पर्यटकांना आणि भाविकांना मिळणार आहे. तसेच, ज्यांना आंब्याची लागवड करायची आहे, त्यांच्यासाठी विविध जातींची रोपेही विक्रीसाठी उपलब्ध करून देण्यात येणार आहेत.
स्टॉल बुकिंग आणि कालावधी:
महोत्सवानिमित्त मंदिर परिसरात रविवार, दि. १० मे ते मंगळवार, दि. १२ मे २०२६ या तीन दिवसांच्या कालावधीत विविध स्टॉल्स उपलब्ध असतील. इच्छुक विक्रेत्यांनी आपले स्टॉल गुरुवार, दि. ७ मे २०२६ पर्यंत बुक करावेत, असे आवाहन आयोजकांनी केले आहे.
सहकार्याचे आवाहन:
श्री देव कुणकेश्वर मंदिर देवस्थान ट्रस्टने परिसरातील आंबा उत्पादक शेतकऱ्यांना मंदिर सजावटीसाठी स्वेच्छेने आंबा देऊन सहकार्य करण्याची विनंती केली आहे. या महोत्सवात सर्व भाविक भक्तांनी मोठ्या संख्येने सहभागी व्हावे, असे आवाहन देवस्थान ट्रस्टतर्फे करण्यात आले आहे.
अधिक माहितीसाठी संपर्क:
७७००९९७५७५ / ८७८८११७१७१ / ८३०८३७२५५०
पत्ता: मु. पो. कुणकेश्वर, ता. देवगड, जि. सिंधुदुर्ग.